गुजरा नगरपालिका–सिम्राभवानीपुर बजारमा ६४९औँ शिरोमणि गुरु श्री रविदास जन्मोत्सव समारोह उत्साह, श्रद्धा र सामुदायिक एकताका साथ भव्य रूपमा सम्पन्न भएको छ। चमार कल्याण समाज नेपालद्वारा आयोजित उक्त कार्यक्रममा समाजका अगुवा, बुद्धिजीवी तथा समुदायका सदस्यहरूको उल्लेख्य सहभागिता देखिएको थियो।
कार्यक्रमको अध्यक्षता चमार कल्याण समाज नेपालका उपाध्यक्ष पुनीत रामले गरेका थिए। समारोहका प्रमुख अतिथि गुजरा नगरपालिकाका नगर प्रमुख सन्तलाल प्रसाद चौधरी र विशिष्ट अतिथि चन्द्रपुर अस्पताल का संचालक सुबास चौधरी रहेका थिए।
कार्यक्रममा वक्ताहरूले गुरु रविदासको जीवनदर्शन, विचार र समाज सुधारमा उहाँले पुर्याएको योगदानबारे चर्चा गरेका थिए। १५औँ शताब्दीका महान सन्त रविदासले जातीय विभेद, छुवाछुत र सामाजिक अन्यायविरुद्ध आवाज उठाउँदै मानव समानता, श्रमको सम्मान र प्रेमको सन्देश फैलाएका थिए। “मन चंगा तो कठौती में गंगा” जस्ता उनका वाणी आज पनि समाजलाई सकारात्मक मार्गतर्फ डोर्याउने प्रेरणा मानिन्छ।
अध्यक्षीय मन्तव्य राख्दै पुनीत रामले गुरु रविदासको शिक्षा समुदायलाई आत्मसम्मान, एकता र चेतनातर्फ उन्मुख गराउने बलियो आधार भएको बताए।
प्रमुख अतिथि सन्तलाल प्रसाद चौधरीले गुरु रविदासको सन्देश वर्तमान समाजमा अझ सान्दर्भिक रहेको उल्लेख गर्दै भने, “हामीले विभेदभन्दा माथि उठेर मानवताको मूल्यलाई आत्मसात गर्नुपर्छ। गुरु रविदासले देखाउनुभएको बाटो सामाजिक सद्भाव र समावेशीताको आधार हो।”
विशिष्ट अतिथि सुबास चौधरीले गुरु रविदासको विचारले नयाँ पुस्तालाई सही दिशा दिने बताउँदै भने, “इतिहास र आदर्शलाई सम्झँदै समाजलाई शिक्षित, सचेत र एकताबद्ध बनाउनु हाम्रो दायित्व हो। गुरु रविदासको सन्देशले आज पनि समुदायलाई सकारात्मक ऊर्जा दिन्छ।”
समारोहका क्रममा सांस्कृतिक प्रस्तुति, शुभकामना आदानप्रदान तथा सामुदायिक अन्तरक्रियाले कार्यक्रमलाई थप अर्थपूर्ण बनाएको आयोजकले जनाएको छ।
