चुरे भावर पार्टी नेकपामा विलय, प्रचण्ड–न्यौपानेबीच सहमति पत्रमा हस्ताक्षर

चुरे भावर पार्टी औपचारिक रूपमा नेपाली कम्युनिस्ट पार्टी (नेकपा) मा समाहित भएको छ। मंगलबार काठमाडौंस्थित नेकपाको केन्द्रीय कार्यालय पेरिसडाँडामा आयोजित विशेष कार्यक्रममा चुरे भावर पार्टी नेकपामा विलय भएको घोषणा गरिएको हो। कार्यक्रममा नेकपाका संयोजक पुष्पकमल दाहाल ‘प्रचण्ड’ र चुरे भावर पार्टीका अध्यक्ष बद्री न्यौपानेबीच पार्टी एकीकरणसम्बन्धी सहमतिपत्रमा हस्ताक्षर गरिएको छ। सहमतिसँगै चुरे भावर पार्टीका नेता तथा कार्यकर्ताहरू नेकपाको संगठनात्मक संरचनामा समाहित हुने जनाइएको छ। नेताहरूले देशको वर्तमान राजनीतिक अवस्थालाई मध्यनजर गर्दै वाम एकता अझ सुदृढ बनाउन यो निर्णय महत्वपूर्ण रहेको बताएका छन्। कार्यक्रममा दुवै पक्षका नेताहरूले समावेशी राजनीति, जनमुखी एजेन्डा र राष्ट्रिय हितका विषयमा सहकार्य गर्दै अघि बढ्ने प्रतिबद्धता व्यक्त गरेका छन्। पार्टी एकीकरणले आगामी राजनीतिक गतिविधि र संगठन विस्तारमा सकारात्मक प्रभाव पार्ने अपेक्षा गरिएको छ।